Namminersornerullutik Oqartussat kommunillu inissiaattaannik innersuussisarneq, attartortitsisarneq, attartortut allanut attartorallartitsisarnerat il.il. pillugit Namminersornerullutik Oqartussat nalunaarutaat nr. 24, 10. oktober 2000-imeersoq.

 

Inissianik attartorneq pillugu Inatsisartut peqqussutaanni nr. 3-mi 13. juni 1994-imeersumi, kingusinnerusukkut Inatsisartut peqqussutaatigut nr. 3 29. oktober 1999-imeersukkut allannguuteqartinneqartumi, § 4, imm. 7 aamma § 21, imm. 3 naapertorlugit aalajangersarneqarput:

 

Kapitali 1.
Attartortitsisoq

§ 1. Attartortitsisutut paasineqassaaq A/S Inissiaatileqatigiiffik INI, inissianik attartortitanik piginnittoq ingerlatseqatigiiffimmik inissianik ingerlatsinissaq allaffissornikkullu aqutsineq pillugu isumaqatigiissuteqarsimappat.

 

Kapitali 2.
Malittarisassat atuuffii

§ 2. Nalunaarut manna imm. 2-5-imi taaneqartut atuutinngiffiusut eqqaassanngikkaanni, inis-sianut Namminersornerullutik Oqartussanit kommuninillu pigineqartunut atuuppoq.
Imm. 2. Nalunaarut ukununnga atuutinngilaq:
1) atorfimmut atatillugu inissiatut nalunaarsorneqartunut,
2) inissianut, siunertanut aalajangersimasunut piginnittumit immikkoortinneqartunut, soorlu inissiat siunertanut aalajangersimasunut atugassiat, Namminersornerullutik Oqartussani pisortanut inissianut, nunaqarfinni ilinniartitsisunut inissianut, utaqqiisaagallartumik najugaqarfigisartakkatut inissianut, inuussutissarsiornermik ineriartortitsinernut assigisaanuulluunniit atorneqartartunut,
3) inissianut, nakkutilliinermi sulisunut attartortitsisumi atorfilinnut,
4) inissianut, innarluutilinnut imaluunniit pitsorluttunut immikkut sanaannut/aaqqissuussanut,
5) inissianut aamma ininut najugassiaanngitsutut atorneqartunut.
Imm. 3. Nalunaarummi § 4, imm. 1 aamma §§-it 21-22 inissianut suliffeqarfiit sulisunut inissiaattut ataatsimoorussanik atugassanngortitaasunut, Naalakkersuisunit aalajangersarneqartunut atuutinngilaq.
Imm. 4. Inissiat sorliit, sulisunut inissiatut atugassanngortinneqartut akornanni pilerinartutut inuerunnerminnilu suliffeqarfinnut, taakkulu sulisuinut sulisunut inissiamik pisinnaatitaasunut, ilanngunneqassanersut Naalakkersuisut aalajangersassaavaat. Inissiat taamaattut pillugit qinnuteqaatit isummerfigineqarnerat qinnuteqartut Kalaallit Nunaanni pisortani qanoq sivisutigisumik sulisimanerat kiisalu §§-it 5 aamma 20 tunngavigalugit pisarpoq.
Imm. 5. Nalunaarummi §§-it 4-5 aamma 18-20 makkununnga atuutinngillat:
1) inissiaq iluarsaassinernut isaterinernulluunniit atatillugu Namminersornerullutik Oqartussat kommunilluunniit inissaqartitsigallarnissamik pisariaqartitaannut atorneqassappat,
2) inissiaq inissaqartitsinissamik qularnaveeqqusikkamut innersuussutigineqarpat, imaluunniit
3) inissiaq isumaginninnermi ajornartorsiutit piaartumik aaqqittariallit aaqqinneqarnissaannut kommunalbestyrelsip atugassanngortippagu.

 

Kapitali 3.
Utaqqisut allattorsimaffii innersuussisarnerlu

§ 3. Inuk kinaluunniit 15-inik ukioqalereersoq utaqqisut allattorsimaffiannut ilanngunneqarsinnaavoq, taamaattorli tak. § 19.
Imm. 2. Attartortitsisoq kommunini tamani utaqqisut allattorsimaffiinik ingerlatsissaaq. Kommunimi Namminersornerullutik Oqartussat aamma kommunip inissiaataat ataatsimoortillugit utaqqisut allattorsimaffiinik pilersitsisoqarsinnaavoq. Inissarsiortup kommunimi utaqqisut allattorsimaffianni inissisimanera kommunimi allami utaqqisut allattorsimaffiannut nuunneqarsinnaanngilaq.
Imm. 3. Utaqqisut allatorsimaffiannut ilanngutsitsineq attartortitsisup 100 kr.-inik sullissinermut akiligassiissutigissavaa. Allaffissornikkut aqutsinermut akiliutit 100 kr.-iusut utaqqisut allattorsimaffiata aaqqiivigineqarnerani ukiumut ataasiarlutik akiligassinneqartassapput. Sullissinermut akiliutinik akiliinngitsoorneq utaqqisut allattorsimaffiannit peerneqarnermik kinguneqassaaq. Taamaattorli attartortitsisup utaqqisut allattorsimaffiannniit peerneqavinnissaq pilersinnagu pineqartoq pissutsinik aaqqeeqqullugu allakkatigut naleqquttumik piffissalerlugu nalunaarfigissavaa.
Imm. 4. Inissarsiortut, utaqqisut allattorsimaffianni ilanngunneqartut, tamanna noqqaassutigigunikku, utaqqisut allattorsimaffianni qanoq inissisimanertik pillugu paasitinneqassapput.
Imm. 5. Imm. 2-4 aamma taamatut atuutissapput namminneq kissaateqarlutik nuunniartut qularnaveeqqusiivigineqartut utaqqisut allattorsimaffiiniittunut.

§ 4. Inissiat inoqanngitsut inissarsiortunut utaqqisut allattorsimaffianni sivisunerpaamik allassimasimasunut innersuussutigineqassapput.
Imm. 2. Attartortut kissaateqartut allamik initaarnissamik, tassa imaappoq namminneq kissaatigalugu nuukkusuttut inimilluunniit paarlaakkusuttut namminneq kissaatigalugu nuukkusuttut allattorsimaffiannut ilanngunneqassapput, tak. §§-it 15-17.
Imm. 3. Attartortut initaaqqinnissamik qularnaveeqqusiivigineqarlutik attartukkaminnik attartorunnaartut, tak. § 10, qularnaveeqqusiivigineqartut allattorsimaffiannut ilanngunneqassapput, tak. § 3.

§ 5. Inissianik innersuussinermi inissiami init amerlassusiat inissarsiortup ilaqutaasa qassiussusiannut naapertuuttuussaaq.
Imm. 2. Inoqutigiinni inuit amerlassusiannit ataatsimik amerlanerusunik initalimmik innersuussisoqarsinnaavoq, innersuussinerup nalaani tamanna periarfissaqarpat.
Imm. 3. Najukkani ataasiakkaani inissianik attartortitsiniarneq ajornartorsiutitaqartoq paasinarsippat, inissiamik ininik inoqutigiit amerlassusiannit ataaseq sinnerlugu amerlanerusunik initalimmik qaqutigooraluartumik tunniussisoqarsinnaavoq.

 

Kapitali 4.
Attartortut allanut attartorallartitsisarnerat
aamma inissaqarnissamik qularnaveeqqusiineq

§ 6. Namminersornerullutik Oqartussat kommunillu inissiaataannik attartortittakkanik attartortup attartukkani taamaallaat allanut attartorallartissinnaavaa attartortitsisup akuersissuteqarneratigut, atugassarititaasullu taassuma akuerisai malillugit. Attartugaareersumik allanut attartorallartitsisoqarnissaa attartortitsisup itigartissinaavaa, attartortup attartorneq pillugu isumaqatigiissut malillugu pisussaaffini eqqortissimanngippagit, aamma tak. §§-it 18-20.
Imm. 2. Sulisunut inissiat atorfeqarnermut atatillugu atugassanngortinneqartut taamaallaat allanut atugassanngortinneqarallarsinnaapput, inigisamiinnginneq ilinniagaqarluni allami najugaqarnermik pissuteqarpat, aamma imaattoqarpat:
1) ilinniagaqarluni allami najugaqarneq uppernarsarlugu sulisitsisoq oqaaseqaateqarpat,
2) sulisitsisoq sulisup peqannginnerani inissiamik atugassaqartitsippat, aamma
3) sulisup PBS aqqutigalugu peqannginnermini inimut akilersuinissani aningaaserivimminut isumaqatigiissuteqarpat.

§ 7. Attartortitsisup inissiap attartorneqartup ukioq ataaseq tikillugu allanut attartorallartinnissaa akuerisinnaavaa.
Imm. 2. Attartortitsisup attartortup allamut attartorallartitsinerata ukiut ataasiakkaarlugit sivitsorneqartarnissaa akuersissutigisinnaavaa, attartortup inigisaminit peqanngikkallarnera makkuninnga pissuteqarpat:
1) ilinniagaqarluni allami najugaqarneq,
2) napparsimmavimmi sivisuumik uninnganeq,
3) pinerluttulerineq pillugu inatsit tunngavigalugu pinerluuteqarsimasunik isertitsivimmiinneq, imaluunniit
4) pissutsit taaneqartunut assingusut.
Imm. 3. Inissiamik attartorneqareersumik allamut attartortitsigallarnerup akuerineqarnissaani piumasaqaataavoq akiliutigitinneqartut attartortup ineqarnermut, kiassarnermut, innaallagissamut, imermut il.il. akiliutaasa amerlaqatigissagaat. Pissutsit immikkut ittut tamanna ajornartinngippassuk, assersuutigalugu allamut attartortitsigallarnermi pequtit ilaatinneqarpata, akiliutigitinneqartut amerlanerusunngorlugit aalajangersarneqarsinnaapput.
Imm. 4. Attartortoq pisinnaatitaavoq peqannginnermini attartorallartitaminut qularnaveeqqummik akiliuteqaqqusinissaminut, attartortup peqannginnerani pisussaaffiinut attartorallartup qularnaveeqqusiussassaanik. Qularnaveeqqut, aallarniutissaq, aamma ineqarnermut siumoortumik akiliutit annerpaamik qaammatini arfinilinni attartornermi akiliutit amerlaqatigisinnaavaat.

§ 8. Attartorallartitsinerup nalaani ineqarnermut akiliutit kiassarnermullu siumoortumik akiliutit piffissaagallartillugu akilerneqartarnissaannut attartortoq akisussaavoq. Aammattaaq attartortinneqartumi aserukkanut atortuinillu illersorneqarsinnaanngitsumik iliuuseqarnikkut attartorallartumit, taassuma inoqutaataanit, inunnillu allanit taamatut attartorneq aqqutigalugu inissiami taassani najugaqartunit aserorneqartunut, attartortoq taarsiinissaminut akisussaavoq.
Imm. 2. Inuit imm. 1-imi taaneqartut inissiarsuani attartortakkani torersaarnissamut ileqqoreqqusanut malinninnerannut attartortoq attartortitsisumut akisussaavoq.

§ 9. Allamut attartorallartitsinissamik qinnuteqaat attartortitsisumut allakkatigut tunniunneqassaaq, allamut attartorallartitsinissap aallartinnissaa kingusinnerpaamik qaammammik ataatsimik sioqqullugu, makku ilanngullugit oqaatigalugit:
1) attartorallartussaq taassumalu inoqutai pillugit paasissutissat,
2) attartorallarnerup sivisussusia,
3) attartorallarnermi akiliutit amerlassusissaat, matumani ineqarnermut akiliutinut, kiassarnermut, innaallagissamut, imermut, pequtinut akiliutinut imaluunniit immikkut akiliutinut il.il. aningaasartuutit amerlassusiat ilanngullugit taallugit,
4) qularnaveeqqutinik akiliuteqartitsisoqassappat taakku akilerneqarnissaat pillugu paasissutissat, tak. § 7, imm. 4, kiisalu
5) attartorallartitsinerup nalaani attartortup piffissami aggersumi sumi najugaqarnissaa pillugu paasissutissat.
Imm. 2. Allanut attartorallartitsineq attartortup attartukkamillu attartorallartup akornanni toqqaannartumik aamma allakkatigut isumaqatigiissuteqarluni pissaaq, aamma allanut attartorallartitsineq pillugu isumaqatigiissut Ineqarnermut Naalakkersuisumit akuerisaasoq atorneqassaq.

§ 10. Attartortoq inissiamik attartukkaminik allamut attartorallartitsinissamut piumasaqaataasunik eqqortitsisoq, tak. §§-it 6 aamma 7, inigisami allamut attartorallartinnissaanut taarsiullugu, attartorallartitsinerup naanerani illoqarfimmi tassani inissaqartinneqarnissaminut qularnaveeqqusiiffigitissinnaavoq, attartornini atorunnaarsikkuniuk.
Imm. 2. Inissaqartinneqarnissamik qularnaveeqqusiivigeqqulluni qinnuteqaat allaganngorlugu attartortitsisumut nassiunneqassaaq inissiamit attartukkamiit aninissaq kingusinnerpaamik qaammammik ataatsimik sioqqullugu.
Imm. 3. Inissaqartinneqarnissamik qularnaveeqqusiinerup qanoq sivisussuseqarnissaani peqanngikkallarnissap sivisussusia apeqqutaavoq aamma ukioq ataaseq naammatsillugu tunniunneqartarluni, piumasaqaatinik eqqortitsinermut uppernarsaatit nassiunneqarnerisigut, tak. §§-it 6-7.
Imm. 4. Attartortup inissaqartinneqarnissamik qularnaveeqqusiineq atorusuppagu, inissiamik innersuuteqqulluni allakkatigut qinnuteqaat, piffissaq inissiamut iserterfissatut kissaatigineqartoq qaammatinik pingasunik sioqqullugu attartortitsisumut nassiunneqassaaq. Inissiamik innersuussineq § 5-imi tunngaviusut malillugit pissaaq, inissiallu innersuunneqartup pitsaassusiata inissiap qimatap pitsaassusianut naapertuuttuunissaa anguniarneqassalluni.

 

Kapitali 5.
Inisimasunut ineeqqanik attartortitsineq

§ 11. Inisimasunut ineeqqanik attartortitsineq taamaallaat pisinnaavoq inisimasoq ilanngullugu najugaqartut tamarmik amerlassusiata inissiami init najugarineqartut qaangersimanngippagit.
Imm. 2. Attartortitsineq attartortup inisimasullu akornanni toqqaannartumik aammalu allallugu isumaqatigiissuteqarnikkut pissaaq.
Imm. 3. Imm. 1-imik unioqqutitsineq nassataqassaaq, attartortup nammineq attartornermut piumasarisanik naammassinninnginnerattut isigineqarnerannik, tak. Inissianik attartorneq pillugu Inatsisartut peqqussutaanni nr. 3-mi 13. juni 1994-imeersumi § 33, imm. 1, nr.2.

§ 12. Inisimasup attartornerminut akiliutaa inissiami attartornermut, kiassarnermut, imermut, innaallagissamut il.il. init amerlassusiat naapertorlugu naatsorsuussamik annertussuseqassaaq.
Imm. 2. Inisimasoq attartornerminut attartortumut qaammatip aallaqqaataani siumoortumik akiliisassaaq.
Imm. 3. Attartortup kingusinaartumik akiliinerup malitsigisaanik attartortitsinermik isumaqatigiissut atorunnaarsissinnaavaa, inisimasoq attartornerminut qaammatip aallartinnerani kingusinnerpaamik ulluinnaat pingajuanni akiliinngippat. Attartortup attartortitsinermik isumaqatigiissut kingusinaartumik akiliinerup malitsigisaanik atorunnaarsippagu, inisimasoq attartukkamininngaanniit erniinnaartumik allamut nuussaaq.
Imm. 4. Inisimasup pisussaatitaaffeqarneri qulakkeerniarlugit attartortup siumoortumik akiliutissaq, qaammatini pingasuni attartornerminngarnit annertunerusussaanngitsoq aalajangersinnaavaa, tak. imm. 1.

§ 13. Inimik attartorneq attartortumit qaammatinik pingasunik sioqqutsilluni qaammatip naaneranut atorunnaarsinneqarsinnaavoq, inisimasullu attartorneq qaammammik ataatsimik sioqqutsisumik qaammatip naaneranut atorunnaarsissinnaallugu.

§ 14. Attartortup attartornera atorunnaarpat, inisimasup attartornera piffissaq taanna peqatigalugu atorunnaassaaq.
Imm. 2. Attartortoq attartornermi atorunnaarneranik nalunaarfigineqaruni, tak. imm. 1, attartortup pissutissaqanngitsumik kinguarsaanani inisimasoq tamatuminnga nalunaarfigissavaa.

 

Kapitali 6.
Nammineq kissaatigalugu nuunnerit aamma inissianik paarlaannerit

§ 15. Attartortut namminneq kissaatigalugu nuunniartut, inissiamilluunniit paarlaateqateqarusuttut allattorsimaffianni ilaasut, tak. § 4, imm. 2, taamaallaat illoqarfigisap iluinnaani nammineq kissaatigalugu nuunnissamut inissiamilluunniit paarlaateqateqarnissamut innersuunneqarsinnaapput.
Imm. 2. Nammineq kissaatigalugu nuuffissamik innersuussisoqassappat attartortitsineq pillugu peqqussut sukkulluunniit atuuttoq tunngavigalugu attartornermut nutaamik isumaqatigiissusiortoqarnissaa piumasaqaataavoq, matumani qularnaveeqqutitut akiliutaasartut akilerneqarnissaat ilanngullugit.

§ 16. Attartortut nammineq kissaatigalugu nuunniarlutik utaqqisut allattorsimaffianni qinnuteqaateqartut, inissianik marlunnik tunniussinermikkut periarfissaqartut inissiamik ataatsimik innersuunneqarnissaminnut, nammineq kissaatigalugu nuunniartut utaqqisut allattorsimaffianniittunit siulliutinneqarlutik inissiamik innersuunneqarsinnaatitaapput.
Imm. 2. Attartortut, imm. 1 malillugu nammineq kissaatigalugu nuunnissaminnik innersuunneqartut, aappariikkunnaarnissaq siunertarineqarpat, nammineq kissaatigalugu nuunniarlutik utaqqisut allattorsimaffianni inissisimanermik siusinnerusukkut ulluliunneqarsimasoq atulerseqqissinnaavaat. Namminneq kissaatigalugu nuunniarlutik utaqqisut allattorsimaffianni atulersitseqqinnissaq pillugu kalerriineq attartortitsisumut nammineq kissaatigalugu nuunnissamut innersuussinermiit ukioq ataaseq qaangiutsinnagu nalunaarutigineqassaaq.

§ 17. Nammineq kissaatigalugu nuunniartut allattorsimaffianni qinnuteqaateqartut inigisaminnik paarlaanniarlutik isumaqatigiissuteqarpata tamanna pisinnaavoq, pineqartut nammineq kissaatigalugu nuunniarlutik utaqqisut allattorsimaffianni inissisimanerat apeqqutaatinnagu.
Imm. 2. Inissianik paarlaateqatigiinnissami piumasaqaataavoq inissiat paarlaateqatigiinneqartut pillugit attartornermut nutaamik isumaqatigiissusiortoqassasoq, attartortitsinermut peqqussut sukkulluunniit atuuttoq tunngavigalugu, matumani qularnaveeqqutitut akiliutaasartut akilerneqarnissaat ilanngullugit.
Imm. 3. Inissiamik paarlateqatigiinnermut atatillugu inissiat paarlaateqatigiinnermi ilaatinneqartut nalinginnaasumik iluarsaanneqassapput, imaluunniit nalinginnaasumik iluarsaanneqarsimasutut isikkoqassallutik. Nalinginnaasumik iluarsaassinermut aningaasartuutit attartortumit akilerneqassapput inissianik attartorneq pillugu Inatsisartut peqqussutaanni nr. 3-mi 13. juni 1994-imeersumi § 34-mi malittarisassat malillugit, attartorneq 1. januar 1995-ip kingorna isumaqatigiissutigineqarsimappat, nalinginnaasumilli iluarsaassinermut aningaasartuutit inissiat immikkoortortaqarfiannit akilerneqassallutik, attartorneq 1. januar 1995 sioqullugu isumaqatigiissutigineqarsimappat.
Imm. 4. Inissianik paarlaateqatigiinnermi ilaatinneqartuni imm. 3 malillugu nalinginnaasumik iluarsaassinermut aningaasartuutit inissiat iluarsaanneqarnerisa nalaanni najorneqarnerat pissutigalugu amerlanerusariaqarpata, aningaasartuutit amerlanerusariaqarnerat attartortumit inissiaq qimallugu nuuttumit akilerneqassapput.

 

Kapitali 7.
Itigartitsineq

§ 18. Attartortitsisup attartortitsinissaq itigartitsissutigisinnaavaa, inoqutigiit isertitaat ineqarnermut akiliutinut, kiassarnermut innaallagissamullu aningaasartuutinut matusissutigissallugit naammanngippata, imaluunniit attartortup qularnaavequtitut akiliutaasussat akilersinnaanngikkai naliliisoqarpat.
Imm. 2. Attartortitsisup attartortitsinissaq itigartitsissutigisinnaavaa, inissarsiortoq inissiamik attartornermut kiassarnermulluunniit akilersuutinut akiligassaminik kinguaattooruteqarpat.
Imm. 3. Imm. 2. malillugu attartortitsisup attartortitsinissamut itigartitsisinnaanera sulisunut inissianik innersuussisarnermut atuutinngilaq.

§ 19. Attartortitsisup attartortitsinissaq itigartitsissutigisinnaavaa, inissarsiortoq nammineersinnaassuseqartuunngippat attartornerlu pillugu pisussaaffiliisumik isumaqatigiissuteqarsinnaanani.

§ 20. Attartortitisup inissarsiortunut attartoritsinissaq itigartitsissutigisinnaavaa, inissiami init ataasiakkaat inunnit marlunnit amerlanerusunit najugaqarfigineqartassappata.

 

Kapitali 8.
Pisinnaatitaaffiit allat

§ 21. Inissarsiortut §§-ini 15-17-imi taaneqartut saniatigut siulliunissamut annertunerusunik pisinnaatitaaffilerneqarsinnaanngillat.

§ 22. Inissarsiortup attartortulluunniit toqunerani utaqqisunut allattorsimaffimmi, nammineq kissaatigalugu nuunnissamut utaqqisut allattorsimaffianni, qularnaveeqquserneqartut allattorsimaffianni inissisimanera toqusup aappaanut qimagaasumut nuunneqassaaq.
Imm. 2. Inissarsiortoq attartortorluunniit utoqqalinini napparsimaniniluunniit pissutigalugu paaqqutarinniffimmut assigisaanulluunniit nuuppat, utaqqisut allattorsimaffianni, nammineq kissaatigalugu nuunniartut allattorsimaffianni, inissamik tunineqarnissamik qularnaveeqquserneqartulluunniit allatorsimaffianni inissisimanera inissarsiortup aappaanut nuunneqarsinnaavoq.
Imm. 3. Aappariinnermut naligitinneqarpoq inunnik nalunaarsuiffimmi nalunaarsimasutut ukioq ataaseq inooqatigiittut ataatsimut najugaqatigiinneq, tak. imm. 1-2.

§ 23. §§-ini 21-22-mi pisut taaneqartut eqqaassanngikkaanni attartugaq utaqqisullu allattorsimaffianni inissisimaneq allanut nuunneqarluni tunniunneqarsinnaanngilaq.

 

Kapitali 9.
Atuutilersitsineq

§ 24. Nalunaarut manna 15. oktober 2000 atuutilerpoq.
Imm. 2. Tamanna peqatigalugu Namminersornerullutik Oqartussat kommunillu inissiaataannik innersuussineq attartortitsinerlu pillugit Namminersornerullutik Oqartussat nalunaarutat nr. 52, 29. december 1994-imeersoq aamma Namminersornerullutik Oqartussat kommunillu inissiaataanni ineeqqanik attartortitsineq pillugu Namminersornerullutik Oqartussat nalunaarutaat nr. 58, 29. December 1994-imeersoq atorunnaarsinneqarput.
Imm. 3. Kiisalu kaajallaasitat makkua Namminersornerullutik Oqartussanit pilersinneqartut atorunnaarsinneqarput:
1) Nuup kommuneani illunik aalajangersimasunik pisortaaffiginninneq pillugu kaajallaasitaq 7-12, 12. december 1988-imeersoq,
2) Namminersornerullutik Oqartussat illunik attartortitsineq pillugu kaajallaasitaat 7-22, 20. november 1988-imeersoq,
3) Immikkut inuussutissarsiornermut, allaffissornikkut ingerlatsinermut, kulturimut, isumaginninnermut peqatigiiffeqarnermullu siunertanut (immikkut ittumik attartortitsineq) attartortitsineq pillugu kaajallaasitaq 7-30, 1. maj 1990-imeersoq,
4) Namminersornerullutik Oqartussat attartortittakkatut inissiaataani ineqartut attartortitsisarnerat pillugu kaajallaasitaq 7-39, 30. oktober 1992-imeersoq, kiisalu
5) Namminersornerullutik Oqartussani sulisunut inissiat pillugit kaajallaasitaq 7-40, 30. oktober 1992-imeersoq aamma immikkoortoq 7, nr. 40-mi § 10 a nutaaq pillugu kaajallaasitatut allakkiaq 30. december 1993-imeersoq.

Namminersornerullutik Oqartussat, ulloq 10. oktober 2000

Steffen Ulrich-Lynge

/

Jens K. Lyberth